NeetNavShabda

અણદીઠા અજવાશ..

2012-01-15T12:51:00.003+05:30

બે વેંતના કાગળને દીધો અજજબનો અવકાશ,

ગળે કરીને હાર દોરાનો દેખાડ્યું આકાશ.

વાદળ ને અડકીને જોને બહેક્યા મારા શ્વાસ!

ધન્ય થયું જીવતર,પામ્યો હું અણદીઠા અજવાશ!

-ગુરુદત્ત ઠક્કર.

ગઝલ: હોઈ શકે

2011-12-19T19:17:00.001+05:30

આ કોરો કાગળ પણ એક આખી કવિતા હોઈ શકે

જો દોસ્ત તું મોકલનારનુ નામ જરા જોઈ શકે!

અજવાળા ક્યાંક ભૂત થઈ ભમતા હશે અંદર હવે,

બાકી મીચેલી આંખ આ સ્વપ્ન શાને ખોઈ શકે?

આ જીવતરના મરમ એ ચોકકસ સમજ્યો હશે,

જે આમ રડતાં રડતાં હસે,ને હસતાં હસતાં રોઈ શકે!

આ મૃગજળ ને માની જળ, જો લે હાથમાં હળ,

તો શુષ્ક રણ વચાળેય તું લીલા આંબા બોઇ શકે!

થનગનું છું ચુંટાઇ જવા રાતભર નાહી ઝાંકળથી,

તવ ચરણ-અર્ધ્યે પૂજારી, શાયદ મને નાં ધોઈ શકે।

આ કોરો કાગળ પણ એક આખી કવિતા હોઈ શકે!

જો દોસ્ત તું મોકલનારનુ નામ જરા જોઈ શકે!

-ગુરુદત્ત ઠક્કર

હર ક્ષણ .

2011-10-28T11:24:00.002+05:30

તિથી ને ચોઘડિયાના તૂટ્યા સઘળા વહેમ
હર ઘડી શુભ યોગ, હર ક્ષણ બસ પ્રેમ!
-ગુરુદત્ત ઠક્કર.

સમજાય નહી!(ગઝલ)

2011-10-05T10:45:00.002+05:30

જાતે ખરી જા ડાળથી હવે ઓ પીળુંડા પાન તું,
છેલ્લું પાન ખરતાં લગી કંઈ પાનખર રોકાય નહી!

ક્યાંક આઘો જઈને ધખ આ રણથી ઓ સૂરજ જરા,
આ ઝાંઝવાનાં જળ થકી કંઈ વાદળા બંધાય નહી!

વાદળ ને કહો કે વિસરે હવે ડગર આ નગર તણી-
પાકી છત ને છત્રી તળે કોઈ હવે ભીંજાય નહી!

પારા જેવી હરકતો આ ફલક પર ઝાકળ કરે,
રખે મરકતાં ફૂલની આંખો ભીની દેખાય નહી!

પૂરતાં શબ્દકોષ છે ને કેટલીય ભાષાનાં ચલણ,
આખર સુધી અક્ષર અઢીના મરમ તો’ય સમજાય નહી!

-ગુરુદત્ત ઠક્કર.

ગજ્જબનો સંબંધ!

2011-09-03T10:54:00.003+05:30

એક નજર અડકી જાય છે,બે બોલ તોડી જાય છે,

ચોતરફથી મજબૂત છાતીમાં ભલે અકબંધ છે!

ખૂનની નદીઓ વહે છે ત્યાં રાતદિન ને સતત,

તહોય નજાકતથી આ દિલને ગજ્જબનો સંબંધ છે!

-ગુરુદત્ત ઠક્કર।

ગઝલ વિસ્તરે...

2011-08-08T00:45:00.002+05:30

મૃગજળ ભરેલ રેતીના અહીં કણ વિસ્તરે

તરસ છીપે નહી, અંદર કોઈ રણ વિસ્તરે.

ઘડી બે ઘડી મિલન પછી વિયોગોનો યુગ,

રૂધિરવાહિની ને રસ્તે થઈ હરણ વિસ્તરે.

પગરવ પગરવ કેડી કેડી પગદંડી થઈ,

વટેમાર્ગુમાં કો’ હરીયાળી ક્ષણ વિસ્તરે.

દ્રશ્યોને ઝાંખપ લાગે ઢળતાં સૂરજની,

સ્વપ્ન ખોલતાં પાંખ જ્યહિ પાંપણ વિસ્તરે.

આવે માટીની સોડમ લઈ ભીના સંદેશા,

દૂરદેશ નું પોતીકું સ્મરણ વિસ્તરે!

મૃગજળ ભરેલ રેતીના અહીં કણ વિસ્તરે

તરસ છીપે નહી, અંદર કોઈ રણ વિસ્તરે!
-ગુરુદત્ત ઠક્કર.

2011-08-05T15:41:00.002+05:30

પલક ઢળે પણ આંખ સુવે નહી;

હાથ હારે પણ પાંખ સુવે નહી.

આ અંતરના ધ્રુવપ્રદેશે,

સાંજ ઢળે પણ રાત સુવે નહી!

-ગુરુદત્ત ઠક્કર.

કાર્ડીયોગ્રામ...

2011-07-29T11:30:00.001+05:30

કેટલાં ઉતાર-ચઢાવો સંવેદનોનાં હ્રદયમાં

..........આ કાર્ડીયોગ્રામ બતાવે છે....

આયખું ખૂટે તહી મળે છે સીધો સપાટ રસ્તો

...........આ કાર્ડીયોગ્રામ બતાવે છે....

-ગુરુદત્ત ઠક્કર.

શ્વેત......

2011-07-29T11:15:00.002+05:30

કાળી સડકોથી ફંટઇને કંડારી કેડી એક શ્વેત

કોરા કાગળમાં હવે લ્યો, ઉકેલો અક્ષ્રર પણ શ્વેત

રક્ત રંજીત હૈયે વહેતા રુધિર તણાં આ રંગો શ્વેત

સતરંગી શબ્દો ઓળંગી ઓઢ્યાં મૌન આકાશો શ્વેત..

Fwd: shradhdhaanjali.....

2011-06-28T18:03:00.001+05:30

---------- Forwarded message ----------
From: Dr. JAGDIP NANAVATI <dr_jknanavati@yahoo.co.in>
Date: 2011/6/27
Subject: shradhdhaanjali.....
To: GURUDATT THAKKAR <gurudattthakkar@gmail.com>

ભાઈ શ્રી ગુરુદત્ત,
અચાનક પિતાશ્રીના અવસાનના સમાચાર જાણી
ખરેખર આઘાત લાગ્યો....આપનો એસ. એમ. એસ.
મળ્યો ત્યારે તેઓ જેના શરણમાં ગયા, તેના જ ધામ
શ્રીનાથજીમાં હું હતો....આજે જ સવારે પાછો આવ્યો..
રૂબરૂ આવી શક્યો નહીં તો દરગુજર કરશો....વળતા રાતે
બસમાં ઉઠેલી તેમના પ્રત્યેની એક લાગણી અહી શબ્દાંજલિ રૂપે
મોકલું છું...તેમનું કાર્ય બધા મળીને આગળ ધપાવીએ
એજ તેમને સાચી શ્રધ્ધાંજલિ.....
પ્રભુ તેમના આત્માને શાંતિ અર્પે...
અને આપ સહુ કુટુંબીજનોને આ કારમો ઘા સહન
કરવાની શક્તિ અર્પે...
અસ્તુ...
ડો. નાણાવટી

આંસુઓનું હોય છે કેવું વજન
જાણજો, જ્યારે ગુમાવો એક સ્વજન

લાગણી ઉમટી પડી દિપાવવા
જે પ્રસંગે એક પણ નહોતું ઈજન

પાક હાથે, પુણ્યની પકડી કલમ
હર ગઝલ કે ગીત, જાણે કે ભજન

કેટલી ભાષા ભમીને ભોમિયો
મૌનની લાં..બી મઝલ કાપે સુજન

કર્મ એનુ પ્રજ્વલિત રાખો સદા
એજ સાચી અર્ચના, ને છે પૂજન

DO VISIT MY SITE FOR ENJOYING MY CREATIONS...AND DO OPINE...

www.jkshabdasoor.blogspot.com

and to listen to my songs click on a direct

link.... http://www.zingerartist.com/Zartists/bands/4168/

thanks.........

ફાગણીયો ..

2011-03-09T10:23:00.003+05:30

વાસંતી વાયરાના વિસરાતા સૂર

તોય ફૂલ બધા એનાજ નશામાં ચૂર।

જોને આંગણામાં કેસૂડાના ફૂટ્યાં અંકુર!

સખી! ફાગણીયો ખાસ નથી હવે દૂર!

-ગુરુદત્ત ઠક્કર.

નગરમા વસંત..

2011-02-16T17:05:00.004+05:30

ઋતુઓ થી સૌ રાહ જુએ છે, તુ આવી છે આખર,

લીલપ ને સુગંધોથી સઘળું કરી દે તરબતર!

બસ છોડ ભટકવું અહી ને ત્યાં તુ આમ હવે દર દર,

થા ઠરીઠામ, હે વસંત!અહીયાં બાંધ કાયમી ઘર!

લે સોપ્યાં સૌ ઉપવન ને લ્યે સોંપ્યું આખું નગર!

નિખાર આંગણ સઘળાં, ને હા! તું ય અહી નિખર!

કાયમનો કરાર કર ને નીચે લીલા હસ્તાક્ષર!

પીળું પડે નહી પાંદડું એકે, કનડે નહિ પાનખર.

રે! હુંય અંધ સ્વારથનો-પહોચ્યો તરંગના આ કયે સ્તર?

એમ ઋતુ રોકાય ના ક્યાયે, હવા ન બાંધે ઘર!

ચાલ માંગુ હરિથી, નીખરે-વિકસે મારુ નગર,

પ્રગતિ એની કોઈ ન રોકે, ઋતુ થી હો એ પર!

-ગુરુદત્ત ઠક્કર.

વાસંતી ..

2011-02-13T00:41:00.004+05:30

બોલાવે જો તુ વાસંતી રણકાર કરીને

આવી ગયો લે શબનમ ના શણગાર ધરીને!

લે બીછાવી ફોરમ બધે તારા આંગણ ને સૌ દ્વાર ભરીને,

ખરીશ તો’યે મહેકીશ બદન પર -અત્તરથી એકાકાર કરીને!

-ગુરુદત્ત ઠક્કર.

તારા રૂપ!

2011-01-22T18:49:00.001+05:30

ઊનાળે તુ છાયડી મીઠી,
શિયાળે કૂમળી ધૂપ!
ભીંજવે ચોમાસે ઝરમરથી,
જૂજવા તારા રૂપ!

-ગુરુદત્ત ઠક્કર.

મૃગજળ-એ તો..

2011-01-11T15:00:00.001+05:30

ભીની રેત ને રણ કરી તે સૂરજ ના કરતૂત,
મૃગજળ-એ તો સુકાયેલ દરિયા કેરુ ભૂત!

-ગુરુદત્ત ઠક્કર.

રહસ્યો મળે...

2011-01-02T16:32:00.003+05:30

ખોદો રણ ને
દરિયો નીકળે-
મૃગજળના તહી
રહસ્યો મળે..

ઝરણાં સાથે
પહાડો પીગળે

મૌન હોઠ પર
શબ્દ ખળભળે

ઝાંકળ ક્યાંથી
દરદ પુષ્પના કળે

આંખ મીંચો ને
સ્વપ્નો સળવળે

કાળના અજગર
નવે ગ્રહને ગળે

સપાટીએ શોધું
તુ બેઠો તળે!

-ગુરુદત્ત ઠક્કર.

ડૂબ્યો ભલે ..

2010-12-30T13:29:00.002+05:30

ડૂબ્યો ભલે દરિયા તણા મઝધારમાં
લહેર થકી વારંવાર તને કિનારે મળું છુ.
ડર નહી થોડા પ્રહર અંધકાર થી-
સાંજે ડૂબ્યો, ફરી કાલે સવારે મળું છુ..
-ગુરુદત્ત ઠક્કર.

પ્રતિક્ષા..

2010-12-11T15:26:00.002+05:30

તમારો છે રસ્તો, તમારી દિશા છે,
દિદાર માટે જૂજ પળની પ્રતિક્ષા છે.

મિલનના એ સ્વપ્ને ટક્યા છે આ શ્વાસો,
વિરહ છે તો મારી આ જિજીવિષા છે!

-ગુરુદત્ત ઠક્કર.

સૂરજના કરતૂત

2010-11-29T13:00:00.002+05:30

આ સૂરજના કરતૂત તુ ક્યા પારખે છે?
ચાંદની પર બપ્પોરે કવિતા લખે છે!
દીવા ઓલવાવી મળસ્કે નગરનાં,
રખડેલ જો-સીમમાં જઈ ધખે છે!

-ગુરુદત્ત ઠક્કર.

પર્વ નૂતન વર્ષનુ..

2010-11-01T14:12:00.006+05:30

હો જોજનો અંતર ભલે, અંતર મહી અંતર નથી!

આપના હ્રદય સિવાય આપણુ કોઈ ઘર નથી!

દીવા કર્યા છે આંગણે, ને છે ઝરુખા ઝળહળા

મકાન છો રોશન બધા, પણ મન આ તરબતર નથી!

તહેવાર હો રંગો તણો હો કે પર્વ નૂતન વર્ષનુ,

તારા વિના ઓ દોસ્ત એ કોઈ રીતે સધ્ધર નથી!

-ગુરુદત્ત ઠક્કર.

આથમણે..

2010-10-18T13:54:00.005+05:30

મૂરઝાતા ફૂલો ને જોઈ મનડા ન કર ખારા.
આથમણે તુ ઉદાસ ના હો, રોક નહી અંધારા!
જો મલકાતી રાતરાણી, ને હસે આગિયા સારા,
હમણાં ખીલશે ચાંદ ગગનમા, ઝળહળ થશે સિતારા!
-ગુરુદત્ત ઠક્કર.

સમણાં ના ડુંગર..

2010-10-13T09:49:00.002+05:30

માંડ હજુ તો નભમાં સૂરજ સે'જ પડ્યો છે ઝાંખો,
હજી તો આછું અજવાળુ છે, સાવ ખુલી છે આંખો!
ક્યાંથી સહસા ફૂટે પલકો ને સ્વપ્નોની પાંખો?
કોડી સા નયને કેમ સમાવું ડુંગરસા સમણા લાખો!

-ગુરુદત્ત ઠક્કર.

ફૂટે છે!(ગઝલ)

2010-09-22T18:57:00.003+05:30

વિસ્મયની કળીઓ જેવુ કઈ
અંદર અનાયાસ ફૂટે છે.

લાલ પડ્યાં સડક પર પગલા,
લીલા ત્યાંથી ઘાસ ફૂટે છે.

ભીંજાવાની એક જ મૌસમ,
યાદો બારે માસ ફૂટે છે.
આઈનો ચોખ્ખો થયો ને,
નિતનવા આભાસ ફૂટે છે.
ચાંદ થૈને કમળ ખીલ્યો ત્યાં,
સરવર માં આકાશ ફૂટે છે.
કોરાપણું કોરે કાળજડે
પાંપણમાં ભીનાશ ફૂટે છે.
ધડકનો વાવી'તી ક્યારેક,
આજ મહેકતા શ્વાસ ફૂટે છે.
મુટ્ઠી બીજ કલમનાં વેરો,
ઘટનાઓ ચોપાસ ફૂટે છે.
સો સો આંધી સહી ગયેલા,
દીવામાં અજવાસ ફૂટે છે.
-ગુરુદત્ત ઠક્કર.

રાત થવાની વકી..

2010-09-20T09:41:00.003+05:30

દિન આખો વાલમ હું તો તારે પડછાયે ચાલી,
રાત થવાની વકી હવે, તુ લે હાથ આ ઝાલી!

-ગુરુદત્ત ઠક્કર.

કિનારા..

2010-09-16T00:05:00.005+05:30

કેમ હલેસ્યું હોડું સજનવા,કેમના સઢ તે બાંધ્યા,

પામ્યા નહિ મઝધાર હજીયે,ના કિનારા લાધ્યા..

-ગુરુદત્ત ઠક્કર

મોરની વ્યથા -(ગીત)

2010-09-11T22:57:00.003+05:30

ટહુકા દીધાં ને રૂડાં પીંછાં દીધાં
ને પછી છિનવાયું આખુ આકાશ છે!
મેહુલિયો જોઈને બહુ રે હરખાયા
હવે વાદળને અડવાની પ્યાસ છે..

ભારેખમ સુંદરતા બળવો પોકારે-
મારા ઉડવાના સમણાંઓ ખાસ છે..
મેહુલિયો જોઈને બહુ રે હરખાયા
હવે વાદળને અડવાની પ્યાસ છે..

એના એ ટોડલાં, એની એ ગલીઓ
ને એના એ હરિયાળા ઘાસ છે.
એની એ ક્યારીઓ ને એના એ ફૂદ્દાં,
અહીં એનાં એ ઝાડ આસપાસ છે.

કોણ સુણે ટહુકા,ને કોણ જુએ ઠમકાં
હવે એની એ ઢેલના કંકાસ છે!
મેહુલિયો જોઈને બહુ રે હરખાયા
હવે વાદળને અડવાની પ્યાસ છે..

હોશ રે જાગ્યા ઊંચા પહાડો ઓળંગવાના,
ઊંચી ઉડાન ભરી ભેરુઓ ને મળવાના,
ચંચળ ઝરણાંઓમાં છબછબિયા કરવાના..
પર્વતની ટોચે જઈ ઊગમણાં જોવાના..

કેટલી ખૂંદવી હવે ધરતીની કેડીઓ
દોડી દોડી ને રુંધાતા શ્વાસ છે!
મેહુલિયો જોઈને બહુ રે હરખાયા
હવે વાદળને અડવાની પ્યાસ છે..

પંખીની જાત ને પાંખ આખી હોવી
ને પછી આ તે કેવોક કારાવાસ છે?
હુ ય હવે વિહરુ,ને હું યે સહેજ પામું,
ઊંચે વ્યોમમાં કેવા તે અજવાસ છે!
મેહુલિયો જોઈને બહુ રે હરખાયા
હવે વાદળને અડવાની પ્યાસ છે..

-ગુરુદત્ત ઠક્કર.
(૧૦-૦૯-૨૦૧૦)

ગોકુળ-આઠમ

2010-09-03T17:28:00.004+05:30

ગોકુળ-આઠમ આવી ને જો થઈ યમુના ગાંડીતૂર,

શ્રાવણ પણ આ અમીછાંટણા કરવા થ્યો મજબૂર!

પવન બાવરો થઈ ને શોધે વાંસલડી ના સૂર.

દસ્તક દઈ હૈયે તુ કાના કેમ છે ઓઝલ-દૂર?

-ગુરુદત્ત ઠક્કર.

સાચ્ચુકલો કા’ન..

2010-09-02T05:27:00.002+05:30

હિંડોળા ઝુલવતા હવે બાળક કહે છે-

માડી સાચ્ચુકલો કા’ન અહી લાવને!

માખણભર મટકી ને ફોડવા હવે

ઓલ્યા વારતાના કા’નને બોલાવને!

ભમવા ને રમવા સૌ ભેરુઓ સંગ

માડી ગેડી ને દડો મંગાવને!

આટ્લા વરસોથી સહુ ગીત એના ગાય

છતાં આવે ન કેમ સમજાવને?

હિંડોળા ઝુલવતા બાળક કહે છે

માડી સાચ્ચુકલો કા’ન અહી લાવને!
-ગુરુદત્ત ઠક્કર.

પ્રાણ પૂરી ગયુ.(ગઝલ)

2010-08-29T23:47:00.003+05:30

હતા હોઠ જે એક મોસમથી કોરા,
અમસ્તું ભીનુ કોઈ ગીત સ્ફૂરી ગયું.

ચાતક બની નહિ તમારી અગાસી,
વાદળ વરસવા કેટલું ઝૂરી ગયું.

રાતો હતી સાવ સમણાં વિનાની
ઝોકું પરોઢી સ્વપ્નો પ્રચુરી ગયુ.

અજબ રસ-સભર વહેતી તારી કહાણી,
વળાંકે વળી કોણ છોડી અધૂરી ગયુ?

કબર પર દીવાનાય ખૂટતા'તા શ્વાસો,
ઢળી સાંજે ફરી પ્રાણ કોઈ પૂરી ગયુ.

-ગુરુદત્ત ઠક્કર.

કામ લાગશે...(ગઝલ)

2010-08-29T08:45:00.001+05:30

આંસુની પણ બચત કરો,કામ લાગશે
એ કસબ હસ્તગત કરો,કામ લાગશે.

અધર મળે જો સ્મિત મઢ્યા તો એના પર,
હોઠોથી દસ્તખત કરો, કામ લાગશે.

તાર કસેલું મળે તણખલુ તો એની
થોડી પણ સંગત કરો, કામ લાગશે.

ઊંઘની સંગ ઉંબરો ઓળંગે જો સમણાં
તો હરિઓમ તત્સત કરો,કામ લાગશે.

લાગણીઓનુ લગવું બાંધે એવી કંઈ
ઊભી બસ નિસબત કરો, કામ લાગશે.

ઉપકારોની ખેંચ સતત વરતાય હવે,
પગભર થઈને પરત કરો, કામ લાગશે.

સુખ તો ભમતા ભૂત સમુ છે, સ્વીકારી
દુ:ખની પણ ખિદમત કરો,કામ લાગશે.

-નવનીત ઠક્કર.

નજર્યુંના કારનામા-ગીત

2010-08-26T09:57:00.003+05:30

નજર્યુંના કારનામા મનના ભંડકિયામાં
ક્યાં લગી ગોધી હું રાખુ!

મેળે મળ્યાં ને સાથ ચક્કર ફર્યા તે
હવે જીવતર હઉ ચકડોળે નાખુ?

કાગળિયાં હોય તો બાળી યે મેલુ
સખી! હૈયું બળે તે કેમ સાંખું!

કેટલુ ભૂલાયુ ત્હોયે કોરાયુ દલડે ને
ભૂસવા જઉ, થાય નહી ઝાંખુ!

દેવતા મેલે મૂઈ આંખ્યું ને જોબનિયું,
હું યે લપસી કે લાવ ચાખુ!

હાથ સે'જ માંગ્યો એણે ફરવા ફૂદરડી ને
લખી આલ્યું આયખું મેં આખુ!

નજર્યુના કારનામા મનના ભંડકિયામાં
ક્યાં લગી ગોધી હું રાખુ!

-ગુરુદત્ત ઠક્કર.
(૨૨-૦૮-૨૦૧૦)

થઈને! (ગઝલ)

2010-08-25T09:28:00.004+05:30

ના ઊંચા પર્વત -ગહન પાતાળ થઈને,

આવ મળીએ ધરા તલના બાળ થઈને!

લાગણીના દોર રેશમી શુ ધર્યા,

ક્યાંકથી પાછા ફર્યા છે જાળ થઈને!

રાજવી હો હું ભલે,વિક્રમ નથી!

પ્રશ્નો તુ મોકલ નહિ વેતાળ થઈને!

મન હવે લહેરો -સપાટી પર નથી,

મળવું જ હો જો,મળ મને પેટાળ થઈને!

બૂંદ થઈ જો હો વિહરવું વ્યોમમાં,

છોડ આ તલ, ઉડ તુ ઓસ-વરાળ થઈને!

મૌન હો ઉત્તર હવે તો બક્ષજે!

ખૂબ અજમાવી જબાં વાચાળ થઈને!

ખાલી વહેવા નહિ દઉ આ ક્ષણ હવે,

કાલ મળે શાયદ ભર્યો ભૂતકાળ થઈને!

શું લખું ને કેમ સંબોધુ તને?

હુ નિરક્ષર શબ્દનો કંગાળ થઈને!

ક્યાંક ગૂંજે સૂર હજી વનરાવની

એટલે ભટકું મગન ગોવાળ થઈને!
-ગુરુદત્ત ઠક્કર.

વાછટ વાગી..(વરસાદી ગીત)

2010-08-20T14:27:00.006+05:30

બારીથી સહેજ સખી વાછટ વાગી-
ને જાણે પેઠું ચોમાસુ મકાનમાં!

પાલવ નીતરે ને પછી હૈયું નીતરે
ને પછી ઘેલી થઈ દોડું ચોગાનમાં!

જોજન છેટેથી મ્હારો વાલમ પ્રગટ્યો,
જાણે ટહુકે ઓલ્યાં મોરલાના ગાનમા!

કોરાણે મૂકી મે લાજ ભર્યા ગામની,
મૂઇ છબછબીયાં કરતી ફરુ તાનમાં!

કેવી તે ભૂરકી આ વરસે આકાશેથી
ઝાલ સખી! લાવ મને ભાનમાં!

કો'ક મારી કાગળની હોડીઓ દે પાછી
તો સખી! જોબનિયું આલી દઉં દાનમાં!

બારીથી સહેજ સખી વાછટ વાગી-
ને જાણે પેઠું ચોમાસુ મકાનમાં!

-ગુરુદત્ત ઠક્કર.

ઘડી..

2010-08-17T19:14:00.002+05:30

ખીંટી પર ટાંગેલ ઘડી આ રોજ મને પડકારે!

‘મારે કારણ છબી થઈ ટીંગાવું પડશે તારે!’

-ગુરુદત્ત ઠક્કર.

એક વૃધ્ધની કવિતા

2010-08-14T00:01:00.005+05:30

સૂકો છોડવો ને,પીંખાયો છે ક્યારો,

ના કોઇ મહેક, નૂર કે રંગ મારો!

અટકતા ચરણ,ને બટકતાં વિચારો,
લુખી લાગણી, સુક્કી લાઠી સહારો!

નિ:સ્વપ્ન રાતો પામતી ના સવારો,
દુ:સ્વપ્ન સો દિન સાવ લાગે અકારો!

દેખાય ના ક્યાંય આરો-ઓવારો,
કંસાર-સંસાર સહુ સ્વાદ ખારો!

નયનના કૂવામાં ઊણી અશ્રુધારો,
આ ઓઝલ થતાં દ્રશ્ય,ચહેરા ને દ્વારો!

બેસૂર ધડકન નો થ્યો એકતારો,
મુઠીથી સરકતી રેત સો શ્વાસ મારો!

-ગુરુદત્ત ઠક્કર.

લખે છે!

2010-08-10T09:50:00.003+05:30

કોરા કાગળ જેવી રાતો,
સ્વપ્નો પારાવાર લખે છે!

રવ કરતાં સૌ અક્ષર-શબ્દો,
મૌન પણ ભારોભાર લખે છે!

કૂવા ને પનઘટના કિસ્સા,
ઝાઝરના ઝનકાર લખે છે!

હિર-રાંઝા ને લૈલા-મજનુ
પ્રીત ખાંડાની ધાર લખે છે!

પીર-ફકીર નિરક્ષર કોઈ
ગ્રંથ ઘણા દળદાર લખે છે!

કર-કલમ જ્યા શુષ્ક થયા ત્યાં,
આંખો મૂશળધાર લખે છે!

પ્રેમ-પદારથ મૂળ તત્વ છે,
ઉપનિષદનો સાર લખે છે!

-ગુરુદત્ત ઠક્કર.

મન-દર્પણ (ગઝલ)

2010-08-06T09:42:00.007+05:30

મન-દર્પણે દ્રશ્યો ઊભરે ધોળાં કઇ તો કઇ કાળાં!
ભીનાં બહુ જો-લીલ બાઝે ને કોરાં હો તો જાળાં!

મન-વૃક્ષનાં પાન થયા'તાં ટહુકા માટે તરસ્યાં,
કોયલ માની ડાળ ધરી ત્યાં કાગે બાંધ્યા માળા!

મન-ધરા પર સાવ અકળ રે’ મોસમના મિજાજો,
સે'જ વળી જામે શ્રાવણ ત્યાં બેસી જાય ઊનાળા!

મનના પડ્દે ચિત્ર-સ્વપ્ન નિત ઉભરે ઇન્દ્રધનુષી,
રંગો મન પર સે'જ ઢળે ને ચેહરે રંગ નિરાળા!

મનદરિયામા અવિરત ઊછળે ઇચ્છાઓના મોજાં,

અમન-ચેનની હોડી જાણે તરવા ભરે ઊચાળાં!

મનશિખર પર હિમ યાદનો કેડી ધવલ કંડારે,
ઉબડખાબડ રસ્તા લપસે કિસ્સા લઈ સુવાળા!

મનમંદિરમા અખંડજ્યોત કોઇ ધીમુ ધીમુ સળગે,
સૂર્ય-ચંદ્ર વિનાની ઘડીએ પાથરતી અજવાળા!

-ગુરુદત્ત ઠક્કર.

વીરા!

2010-07-09T10:58:00.005+05:30

ઉડો હળવેકથી છે વિજ્ઞાનના પવન વીરા!

જરા સંભાળજો હૈયા તણાં ઉપવન વીરા!

ચૂમી ધરતી વતનની, આંબજો ગગન વીરા!

નિશાનો ઉચ્ચ, છો તન-મનનુ હો દમન વીરા!

પડે કિંમત ભલે પણ મૂલ્યોનું હો જતન વીરા!

વિકાસો એય શું જ્યાં માણસાઈનુ પતન વીરા!

ધરીને હામ કરજો તિમિરનુ હનન વીરા!

પસારો તેજ ને વિશ્વમાં અમન વીરા!

રહસ્યો વેદનાં ખૂલશે કદી પ્રસ્વેદથી,

બનો કર્મઠ, કર્મોની ગત ગહન વીરા!

-ગુરુદત્ત ઠક્કર.

શોધવા નીકળ્યાં!

2010-06-27T16:34:00.006+05:30

આપણેય સજણ કેવાક ભેરૂ શોધવા નીકળ્યાં,

નથી પગભર હજી,એનાં પગેરું શોધવા નીકળ્યાં!

લગાડી હળદરી લેપો, ને માંગી ચંદની મહેંકો

ધરી મ્હેંદી હથેળી રંગ ગેરૂ શોધવા નીકળ્યાં!

પછાડ્યાં ચંદ્ર પર પગલાં,ને ડહોળ્યા કેટલા દરિયા,

સહારા શબ્દનાં લઈ મૌન ઘેરું શોધવા નીકળ્યાં!

ઉતાર્યાં વસ્ત્ર પહેરી બહુ, લીધી-છોડી કંઈ દીક્ષા,

ભર્યા મંદિર મહીં અણજાણ દે્રું શોધવા નીકળ્યાં!

હતા સામે જ તો ચેહરા, નગર ને દ્રશ્ય ગમતીલાં,

મીંચી પાંપણ છતાં સપનું અનેરું શોધવા નીકળ્યાં!

-ગુરુદત્ત ઠક્કર.

લે!

2010-06-06T08:16:00.004+05:30

આ રહ્યો ભૂતકાળ લે!

ગમે તો પંપાળ, લે!

ચાવી નથી ઘડીયાળની

થીજી ગયો આ કાળ, લે!

કરોળિયો સંબંધનો

મૂકી ગયો જંજાળ, લે!

પ્હાડ બરફના યાદના

ભીંજવશે -ઓગાળ, લે!

નીકળ્યા ખુદની શોધમાં,

મળી ખુદાની ભાળ, લે!

-ગુરુદત્ત ઠક્કર.

ભટકે! ..

2010-05-13T15:39:00.006+05:30

કેડી અજાણ માંડે ચરણ-વનરાજી, સુગંધ, ટહુકા,હરણ..

ભટકુ હું વન સકળ , ને પછી મારામાં આખું વન ભટકે!

વર્ષા, મિલન બે ઘડી ને પછી યુગથી શુષ્ક જીવન,

જીદે ચઢે સ્મૃતિ, આ મન, ને નયનમાં સાવન ભટકે!

જમુના તટ, ડાળ કદંબ ને ઓલ્યાં વાંસલડીના સૂર,

મોહનની ભાળમાં વ્યાકુળ પવન, આખુંયે વૃંદાવન ભટકે!

ઘટના ઘટી એક ક્ષણ ને ફર્યા સૌ નકશા ને ઇતિહાસ,

જણવા ફરી એ ક્ષણ હવે ગગન -ત્રિભુવન ભટકે!

મદ સુ ઝરે કંઇ મસ્તકે ને ટપકે ગેબી ગઝલ,

ઝીલવાં અવાક અક્ષરો અહી કેટલાં કવન ભટકે!

-ગુરુદત્ત ઠક્કર.

મેઘધનુષ...

2010-04-27T10:25:00.002+05:30

આ મેઘધનુષ જે નીખર્યા છે તારા આગમનથી,

વિરહની રાતમા વરસેલા નેણની ગવાહી છે!

ગુરુદત્ત ઠક્કર.

ચ્યાંથી લાવશો?

2010-04-07T13:35:00.013+05:30

ઝાંઝવોં હેંચીને ઉછેરેલાં ઉપવનમાં

હાચી લીલાશ્યો ચ્યાંથી લાવશો?

ભમરાં તો ત્હોય જોણે ભાડૂતી ઓણોપણ
ઝાંકળી ભેનાશ્યો ચ્યાંથી લાવશો?

અત્તર છાંટી ને ફૂલે મ્હેલી મ્હેંક્યો,
ઓલ્યાં ઓંબે મેઠાશ્યો ચ્યાંથી લાવશો?

ભોંઠો પડશે હઉ ફૂદ્દો-પારેવો ને
ગાળ્યો દેશે વટે-મારગું..

પેહશે તડ્કેથી કો’ક ખાવા વેહામો તૈ
લેંમડઈ હળવાશ્યો ચ્યાંથી લાવશો?

ઝાંઝવોં હેંચીને ઉછેરે્લાં ઉપવનમાં
હાચી લીલાશ્યો ચ્યાંથી લાવશો?

-ગુરુદત્ત ઠક્કર.

હાઈકુ-કૂંજો

2010-03-24T20:47:00.002+05:30

ઊણો છું કૂંજો

તરસ હો તો થજો

ચતુર કાગ...

-ગુરુદત્ત ઠક્કર.

નથી ..

2010-03-13T12:28:00.005+05:30

નથી બાંગ સુણવી ના પઢવી નમાજો
નથી પાળવા બસ હવે કોઈ રિવાજો.

નિરખવા દો નભમાં ઊગમણાં ને સાંજો,
દો પામવા ઊડતાં પંખીનાં અવાજો..
-ગુરુદત્ત ઠક્કર.

આંખ જે..

2010-03-09T17:58:00.004+05:30

આંખ જે દરિયો હતી ત્યાં વિસ્તર્યુ કોઇ રણ હશે,

એટ્લે જ ભીનાશો ને બદલે ત્યાં હવે મૃગજળ હશે!
-ગુરુદત્ત ઠક્કર.

હાઈકુ:

2010-03-08T09:29:00.002+05:30

કેમ રમે છે

કાળ ને કુદરત

શૂનચોકડી?

-ગુરુદત્ત ઠક્કર.

હાઈકુ..

2010-03-06T21:27:00.003+05:30

પાંપણ પરે

જલકમલવત

ઝાંકળ સરે!

-ગુરુદત્ત ઠક્કર.

હાઈકુ.

2010-03-03T19:02:00.005+05:30

આ ક્ષરદેહે

મળ્યાં નહિ સજણ

શબ્દદેહે તો....

-ગુરુદત્ત ઠક્કર.

આરઝુ-એ-શમ્મા-

2010-03-02T08:56:00.003+05:30

તવ ચરણે

બળવું પીગળવું

ઢગલો થવું..

-ગુરુદત્ત ઠક્કર.

રંગ મુબારક..

2010-03-01T11:41:00.003+05:30

દોસ્ત આપણી દોસ્તીમાં ક્યાં આજકાલી રંગ છે?

કેસુડાંની સ્યાહીથી ચીતરેલાં અંગેઅંગ છે!

એટલે જ તો જીવતરમાં આટલો ઉમંગ છે!

હર સવારે કંકુ તુ વેરે, સાંજ ગુલાલી તરંગ છે!

-ગુરુદત્ત ઠક્કર।

તારા અણગમા ..

2010-02-24T20:21:00.005+05:30

તારા અણગમા

હવે હસ્તરેખાઓ પરનાં

શૂળ બન્યાં છે!

ને મારી દિવાનગી

શિર પરનો કાંટાળો તાજ!

રખે લોક મને

પૂજવા ન લાગે

ઇસુનો અવતાર

સમજીને!

-ગુરુદત્ત ઠક્કર.

બનાવી દે!

2010-02-05T15:52:00.007+05:30

અભિભૂત છું તારા વૈવિધ્ય, રંગ, મ્હેક ને નૂરથી ઓ કુદરત!

મુજ જીવનને તારા સૂર,ગાનમાં મશગુલ બનાવી દે!

છાંટ કંઇ રંગ, થોડી તેજો-સુગંધ મારીયે પ્રતિભા પર,

મને તારા ગુલશનનું બસ એક મ્હેક્તું ફૂલ બનાવી દે!

-ગુરુદત્ત ઠક્કર.

સત્ય ..

2010-01-28T07:54:00.005+05:30

સત્ય જો સફરજન થઈને ડાળી ઉપર લટકે!

દ્રષ્ટિઓ મમ ન્યૂટન થાજો જ્યહિ એ નીચે પટકે!

-ગુરુદત્ત ઠક્કર.

પતંગનું ..

2010-01-15T14:39:00.001+05:30

મારા નામના પતંગનું સધ્ધર જહાન છે,

જ્યાં સુધી તારી આબોહવા ને આસમાન છે!

-ગુરુદત્ત ઠક્કર

2010-01-10T14:46:00.003+05:30

પ્રીતમની યાદ સખી આ તે કેવી કે

જાણે વહેતી હવાઓ ને ટેરવા ફૂટ્યાં!

સ્પર્શે લહેર ને અંગ વ્યાપે રોમાંચ સખી

રોમ રોમ જાણે વનરાવન ઉઠયાં!

-ગુરુદત્ત ઠક્કર.

2009-12-27T20:44:00.002+05:30

હું, તું ’ને પ્રેમ-

જવાબ ત્રિરાશીનો

જડશે કેમ?

-ગુરુદત્ત ઠક્કર.

चले चलो अब!

2009-12-27T20:10:00.005+05:30

धुंए का बन गया नगर है, चले चलो अब

भीड़ से लथपथ सुनी डगर है,चले चलो अब।

हलकाफुलका दिल बेचारा घुटे कब तक,

बोझ से बोझिल बना सफ़र है,चले चलो अब।

धोना भी मुहाल हुआ है इसको यारो,

मैली हो गई ये चद्दर है,चले चलो अब।

छीन झपटकर खाओ पीओ ऐश करो अब,

सबने सीखा ये हुनर है,चले चलो अब।

उलझोगे तो भाग निकलना मुश्किल होगा,

ये संसार इक जालभंवर है,चले चलो अब।

अलसाए तो गए काम से ताकीद उसकी,

हुआ शुरु अंतिम प्रहर है, चले चलो अब।

फेरों में उलझे रहना क्या वाजिब तेरा?

सबकी मंजिल साफ उधर है, चले चलो अब!

-नवनीत ठक्कर.

શાને કાજે!

2009-12-17T23:06:00.000+05:30

મારી ફરતે રોજ નવા એ થોર ઉગાડે,
ઘર થઈને એ પોતાનાથી દૂર ભગાડે.

પડખામાં તો કેવળ હુંનો હું જ સૂતો છું,
તોય જુઓને વળગણ આખી રાત જગાડે.

માણસની તું વાત જવા દે,માણસ ક્યાં છે!
કોની ઉપર મૂરખ ખોટું તું ય લગાડે!

બંને વચ્ચે બથ્થંબથ્થા કરે બુકાની,
પાછળ પડછાયો મારો ને વ્હેમ અગાડે.

કાંતો માયાનો થઈ જા કાં રમતો જોગી,
શાને કાજે બાવાના તુ બેઉ બગાડે!

ચક્ર્સુદર્શનધારીની શી હાલત થઈ છે!
વગડામાં જઈ એકલવાયો શંખ વગાડે!

તારા વિણ ચોપાસ મને દેખાય કશું નહિ,
એવી લગની તું ય મને શું કામ લગાડે?

-નવનીત ઠક્કર.

તે પછી:

2009-12-11T18:45:00.001+05:30

(દુબઈની સાંપ્રત સ્થિતિને અનુલક્ષીને)

સરકતી રેત પર બાંધી ઇમારત, તે પછી,
પડી મૃગજળ પીવાની રોજ આદત,તે પછી.

બધાયે ભોગને તત્પર કર્યા તલસાટમાં,
ખુદાની પણ કરી ખાલી ઇબાદત, તે પછી.

મઝામય જામના અંજામની પરવા વિના,
નિચોવી સાવ નમણી મહીં નજાકત, તે પછી.

તકાદો તોરભૂખ્યો ને વળી તકદીર થઈ તરસી,
રહે સુખો બધાં ક્યાંથી સલામત, તે પછી.

અફીણી દોડને પણ હાંફ ચડતો જોઈને,
રહ્યો ના ફીણનો પારો સલામત, તે પછી.

શીતળતાને સતાવે છે ડૂમો દુ:સ્વપ્નનો,
ઉડાવે ઊંઘ પણ અશ્રૂની જ્યાફત, તે પછી.

થયો ખાલી ખજાનો કે પછી પોકળ હતો પાનો,
સફાળી ધ્રુજવા માંડી શરાફત , તે પછી.

ગુનાઓ ગાંસડી બાંધી ઊભા છે રાહ જોતા,
જુઓને હાંફળી થઇ છે કયામત, તે પછી.

ચલો ગુલશન મહી આળોટીએ ભ્રમણાં બની,
થઈ ગઈ એષણાને પણ અદાવત, તે પછી.

કસમ કોની લઈશું સત્ય કહેવા-સૂણવા કાજે,
અદા અદ્દલ બતાવે ત્યાં અદાલત, તે પછી.

લીધું જ્યાં નામ પરવરનું અદા કરવા નમાજોને,
તરત સમજાઈ ગઈ આખીયે બાબત, તે પછી.

-નવનીત ઠક્કર.

શિયાળો આખો ..

2009-12-01T12:06:00.003+05:30

ઝાકળીયાં તુલસી પાન, આદુ,

લીલી પત્તીનો ઊભરો લીધો,

કૂણે તડ્કે -ચ્હાંની ચુસ્કીમાં

શિયાળો આખો મેં પીધો!

-ગુરુદત્ત ઠક્કર.

દિલમાં મીરાં..

2009-11-30T13:31:00.002+05:30

દિલમાં મીરાં લઈને નીકળું,

જ્યહિ નીકળું આ શહેર

શામનામ લઈ ગટગટાવું

નજર નજરનાં ઝેર...
-ગુરુદત્ત ઠક્કર.

गज़ल

2009-11-23T21:26:00.003+05:30

दर्पन से क्या लेनादेना,पतझर के हम मारे है,

हाथ हमारे आए केवल गुल नहीं गुब्बारे हैं।

कश्ती का है दोष नही, ना तूफां की नीयत खोटी,

जाल बिछा चुपचाप खडे, पतवार लिये मछवारे हैं।

कौन नहीं सुनना चाहेगा गीत खुशी के यार मगर,

लगते बरबस गमखारों को गम के नग्मे प्यारे हैं।

टकराकर खुद अंधे से और कहते हैं क्या अंधे हो?

खूब सताते सुरदासों को ऐसे मे उजियारे है।

तन्हाई भी ढूंढ रही है, तनहा राह वीरानों में,

जिल्लत पर इतराते देखे आज गली-चौबारे है।

कैसा उल्टा खेल रचाया देख तूने ऐ जादूगर,

बूंद बने स्वाति से है पर अश्क भला क्यों खारे है।

सत की नाव केवटिया सतगुरु डूबते देखा है हमने,

झूठ का दामन जिसने थामा उसके वारे न्यारे है।

माना कि ना खिदमत की और घूटने टेके ना लेकिन

अब तो पीछा छोडो किस्मत हम तो बाजी हारे है।

देना चाहे जो भी दे तू मालिक अपनी मर्जी का ,

भीख नहीं मांगेंगे लेकिन कहकर कि दुखियारे है।

-डो.नवनीत ठक्कर.

सब

2009-11-23T20:55:00.002+05:30

आदत से मजबूर हुए सब

घर से कितने दूर हुए सब!

कलजुग की कैसी बलिहारी

कातिल कुछ थे, क्रूर हुए सब!

रैयत की लाशों पर चढकर,

नेता लो मगरूर हुए सब!

मयखानों की क्या गत होगी,

‘मैं’ पीकर चकचूर हुए सब!

इसका कौन इलाज करेगा,

ज़ख्म खुले नासूर हुए सब!

रातों की मस्ती में खोकर

दिन में भी बेनूर हुए सब!

भेजे थे जो रब को हमने,

परचे नामंज़ूर हुए सब!

बचपन रोया खेलूं किससे?

बच्चे तो मजदूर हुए सब!

देश सिसककर कहता, उसके

सपने चकनाचूर हुए सब!

-नवनीत ठक्कर.

ચાતક..

2009-11-13T12:49:00.004+05:30

તારું આમ ગરજવું, ને વરસવું નહિ,

રખે ના ઘાતક નીવડે!

સંભાળજે, આ હૈયાનું તરસ્યુ પંખી

રખે ના ચાતક નીવડે!

-ગુરુદત્ત ઠક્કર.

પણ ગયો!(ગઝલ)

2009-11-05T21:55:00.002+05:30

છૂટી તરસ, ને મૃગજળી આભાસ પણ ગયો,

રણ સમો કોરાપણાં નો ભાસ પણ ગયો!

આયનો તૂટ્યો, ને જાણે શું ગજબ થયો,

‘હું’પણાં નો રોજીંદો અહેસાસ પણ ગયો!

ઓઝલ થયાં ઉજાસ,ને કલરવ શમી ગયો,
ફૂલોને હવે સૂર્યનો વિશ્વાસ પણ ગયો!

જીંદગી બનતી રહી જાણે કેવી નઝમ!

કાફીયા બેઠો નહિ, ને પ્રાસ પણ ગયો!

થાક્યાં જ્યહી આ હાથ શુનચોકડી રમી,

ધડકનો વિરમી, ને પછી શ્વાસ પણ ગયો!

-ગુરુદત્ત ઠક્કર।

તારી યાદોનો બરફ!

2009-10-29T19:42:00.003+05:30

હંકારશે આ દિલની નૈયાને એ જાણે કંઇ તરફ,

ક્ષુબ્ધ ને મદહોશ હું, ઉચ્ચારૂ શું એકે હરફ!

શીતલહેરી, હિમવર્ષા, છાઈ સફેદી ચોતરફ,

સ્વપ્નમાં કે જાગતાં બસ તારી યાદોનો બરફ!

-ગુરુદત્ત ઠક્કર.

આમળતો રહ્યો! (ગઝલ)

2009-10-24T20:59:00.002+05:30

જીવતર, હૈયે વાવેતર કૂણાં, ને કળતર

સંબંધ આ શબ્દો તણો ભળતો રહ્યો!

ગળથૂથીમાં શું કચાશો પાઈ’તી?

પ્રશ્ન ગંગાજળ લગ સળવળતો રહ્યો!

દિનચર્યા રહી ભરી દરબાર શી,

સ્વપ્નમાં ખુદને કદી મળતો રહ્યો!

નિસ્બતો ખરતી રહી છત્તાં હજી

યાદોનો ચરૂ શે ઊકળતો રહ્યો!

ચાંદની પીગળી ઉષાની ગોદમાં,

ચંદ્ર ઝાંખો હાથ આમળતો રહ્યો!

-ગુરુદત્ત ઠક્કર.

હોય છે.(ગઝલ)

2009-10-22T20:38:00.004+05:30

એજ વાતો સહીપણાંની હોય છે

શીતમાં જે તાપણાંની હોય છે.

ટેવ જે તાકી રહે છે વ્હેમથી

ઘર કરેલી, આપણાંની હોય છે.

ટળવળે પણ તહોય બોલે ના કશું

એ તિરાડો બારણાંની હોય છે.

હેતથી સરવા થયેલા હાથમાં

ચળ ફકત ઓવારણાંની હોય છે.

કામ તો ક્યાં હોય છે બહુ બોલકુ

પણ, બડાશો વામણાંની હોય છે.

એક અંગુઠો ફકત મુખમાં લઈ

ઊંઘ તો બસ પારણાંની હોય છે.

જ્યાં ફકત આંખો મળે હળવાશથી

એ ઘડી સંભારણાંની હોય છે.

-નવનીત ઠક્કર.

મુક્તક

2009-10-18T00:44:00.005+05:30

જેટલાં ધીર, એટલાં વીર,

બહારથી નવ રસ, અંદર થી પીર.

મીરા હો કે મીર તકી મીર,

જેટલાં ફકીર એટલાં આપણ અમીર!

-ગુરુદત્ત ઠક્કર.

જે બાકી રહી છે..

2009-10-15T21:01:00.005+05:30

ખુંવારી સહીને ખુમારી ચહી છે.

વ્યથિત થઈ તમારી વ્યથાઓ કહી છે.

ઉખેળો કવનનાં સકળ ગ્રંથ મારા,

છો અક્ષર અમારાં,તમારી સહી છે.

પરીક્ષક થઇ ના તપાસો આ ઘટના,

જીવન પ્રશ્નપત્ર ના ઉત્તરવહી છે.

એકાકી માને ભલે છો જમાનો,

દિલની આ કશ્તી સજોડે વહી છે.

વિતી જીંદગાની સ્તવનમાં તમારા

વધુ એમ વિતે જે બાકી રહી છે..

-ગુરુદત્ત ઠક્કર.

ગુલે ગુલઝાર

2009-10-12T15:55:00.007+05:30

લઈ કો’ શબ્દની પતવાર,

જોતરી અરથને મઝધાર.

નીકળ્યા માઝી થઈ કઈ વાર,

મળે ગુલઝાર પેલે પાર!

ઓ માઝી નક્કી તારી હાર!

નહી આ પાર ન પેલે પાર,

ગુલઝાર તો વહેતી ધાર,

જે રોકાય નહી પળવાર...

ક્વચિત સ્પંદે સિતારી તાર,

કદીક સંતૂરનો રણકાર,

કદીક ભમરા તણું ગુંજન,

કદીક શબનમ તણી બોછાર..

કદીક એ મખમલી આદાબ,

કદીક સજદા, કદીક શણગાર..

ક્વચિત તન્હાઈયો ઘૂંટે,

કદીક પાયલ તણી ઝનકાર!

વહાવે ભાવો ધુંવાધાર,

છતાંયે શુન્યનો સુનકાર!

તસવ્વુરમાં જો પડઘાયો,

જાણે ગુંજી રહ્યો ઓમકાર!

ઝલાશે નહી કદી શબ્દે,

ઝિલાશે મૌનમાં ગુલઝાર!

ચમનમાં અંતરોનાં જો,

મહજ ખામોશીઓ રોપો;

કદીક તો મ્હોરશે પુલકિત,

મહેકતું કો’ ગુલે ગુલઝાર!

-ગુરુદત્ત ઠક્કર.

IN SEARCH OF GULZAR:

(TRANSLATION)
Grabbing the sails of the words, woven
Traversing the whorls of the whispers
My dear friend! May you cross the seas,
In your quest of elusive Gulzar…

Alas! Succeed you will not
He is neither here, nor there
A flowing, restless stream he is
That waits, not for a second

Sometimes, the rhyme of the Sitar strings
Sometimes the flutter of the Bird’s wings
Hypnotic humming of the Bees sometimes
Drops of the morning dew or drizzle divine

Like velvety welcome of a desert king
Or like a damsel’s diamond ring
Like the sound of the empty caves
Or the ripples of the ocean’s waves

Find him you will not in words or verses
You will hear him in succulent silences
Not in fairs or festivals or palaces of prosperity
You will find him in echoes of eternity!

-DR.G.G.OZA
(10th Oct., 2009.)

(On the occasion of the programme Gul-e-Gulzar)

હાઈકુ-

2009-09-30T11:05:00.002+05:30

જંગલ કાપી

શે’ર વસાવ્યું -એમાં

જંગલરાજ!

-ગુરુદત્ત ઠક્કર.

યાદ શું રહે!

2009-08-29T05:21:00.003+05:30

એક હતી તુ,

એક હતો હું,

ને એક આપણ બંનેને

ભીંજવતો સાવન...

બાકી તો યાદ શું રહે!

સમયની મિથ્યા

આવન-જાવન!

-ગુરુદત્ત ઠક્કર.

..કાગળની હોડી..

2009-08-27T21:58:00.004+05:30

વિસ્મયનો કાગળ લીધો

શબ્દોના સળથી મોડી.

સઢ સરીખી એના પર મ્હે

લાગણીઓ ને ચોડી.

હળવે રહી તરતી એ મૂકી

અંતરથી લંગર છોડી.

અર્થ-ભંવરમાં ડૂબે ન, આત્મન!

આ કવિતા-કાગળની હોડી..

-ગુરુદત્ત ઠક્કર.

નથી હોતાં!

2009-08-18T12:03:00.003+05:30

કડવાં વેણ કઈ સૌ હો બસ સત્ય જ,

ને સત્યો બધાંય કઈ કડવાં નથી હોતાં.

જો! ત્યાંય વસાહતો વસી શકે છે,દોસ્ત!

રણ બધાં કઈ સંગ્રામો લડવા નથી હોતા.

પાછા વળો આશિક! જરાં સંકેલ નયનને,

રસ્તે જતાં સૌદર્યો બધાં કનડવાં નથી હોતા.

શા માટે તાસીર સંબંધો ની વલુર્યા કરે છે મન,

વાવેલ નિસ્બતનાં બીજ સૌ ઊખડવાં નથી હોતા.

ઝૂરો નહી દોસ્ત! મિલનને વાગોળતાં શીખો!

ખોવાયેલ લમ્હા સહુ ફરી જડવા નથી હોતા.

-ગુરુદત્ત ઠક્કર

હાઇકુ:

2009-08-16T06:53:00.001+05:30

નમું તિરંગા!

સદા ઉન્નતશિરે

તુ લહેરાજે!

-ગુરુદત ઠક્કર.

હાઈકુ

2009-08-15T20:34:00.002+05:30

ખાલી છિદ્રાળી

અધર-પ્યાસી શ્યામ!

હુ તારી બંસી!

-ગુરુદત્ત ઠક્કર.

હાઈકુ

2009-08-13T13:24:00.003+05:30

હે અશ્રુ!થંભો!

છબી દિલબરની

ન હો ધુંધળી..

-ગુરુદત્ત ઠક્કર।

નિર્મળ આંખોથી...

2009-08-04T10:26:00.003+05:30

આ ખળખળ નિર્મળ આંખોથી

અમ દરિયાઉ શમણાં જોઇ બેઠાં,

કાંઠા ખોયા, વહેણ ગુમાવ્યાં,

અમ સઘળી મીઠાશો ખોઈ બેઠાં॥

-ગુરુદત્ત ઠક્કર.

HAPPY FRIENDSHIP DAY

2009-08-02T20:23:00.003+05:30

મન શિખરે

સતત દોસ્ત તારો

પ્રેમપ્રપાત!

-ગુરુદત્ત ઠક્કર.

ભીતરી દર્દ..

2009-07-26T20:26:00.003+05:30

પલકના ફલક પર જો

ઝીલી શકો તો ઝીલો, પ્રીતમ!

પુષ્પના ભીતરી દર્દ લઈ

સરી છે આ ગઝલની શબનમ॥

-ગુરુદત્ત ઠક્કર.

મારા રોમે રોમને..

2009-07-26T19:52:00.007+05:30

ચાહે વરસે મૂશળધાર યા ઝરમર ઝરમર વરસ,

મારા રોમે રોમને તારી હર બુંદની તરસ!

-ગુરુદત્ત ઠક્કર।

મુદ્દત પછી..

2009-07-18T00:26:00.003+05:30

મુદ્દત પછી આ દિલને ધન્ય પળ મળે,

કે ગઝલને હું , ને મને મારી ગઝલ મળે!

નિરવરાત્રિના એક્લ અવાક મનપુષ્પને,

હળવાં ઉજાસો સાથે હુફાળું ઝાંકળ મળે.

થાકેલી સડક ને જાણે અસ્તાચળ મળે, ને

શુષ્ક કલમને ફરી સ્યાહીઓ ખળખળ મળે.

શ્વાસનાં પાતળા દોરને પાકો વળ મળે ,ને

બસ એમ કરતાં આ આયખાને કળ વળે!

મુદ્દત પછી આ દિલને એવી ધન્ય પળ મળે,

કે ગઝલને હું , ને મને મારી ગઝલ મળે!

-ગુરુદત્ત ઠક્કર.

મારે ભઈ તારું બહું કાંમ સે...

2009-07-04T05:05:00.003+05:30

હાચુ કઉ વાત જાંણે આંમ સે,

મારે ભઈ તારું બહું કાંમ સે....

ચેટલે ઠેકાણે તને હોધી વળ્યો

તો ય તારો ના પત્તો કંઇ લાગે સે,
મળવાનું મન્ન હાળું ઠેબે ચઢે તો

પસે હૂંહરું મંઈ સાતી માં વાગે સે!

ચ્યે દા’ડે તું જ કે’ તારો પગ ચ્યાંય ટક્યો,

બેઠો થઈ ચ્યાંય ઠરીઠામ સે?

મારે ભઈ તારું બહું કાંમ સે...

આંને પુસુ તો કે’ દઈ જાંણે કોણ મૂઓ,

ઓલ્યાને પુસું તો આંસ્યો કાઢે!

કો’ક વળી નાંમ તારું હાંભળતાંવેત

મારી વાત્યને જ ધડમૂળથી વાઢે!

તારા વચોટીયાઓ, પૂસીએ તો

કહે સે કે ઈવડો ઈ આંમ નઈ આંમ સે....

મારે ભઈ તારું બહું કાંમ સે..

અક્ક્લનાં ઓથમીરો પથરા ફંફોહે

પસે હામહામા ઢેખાળા ફેંકે,

ચપટી આલીને તને, ખોબા ધરે

પસે રાતદા’ડો નેંધણીયા હેંકે!

બુધ્ધિનાં બંધાણી બાંધે ભાર્યે કે’

હાવ બધા બુધ્ધિના જાંમ સે...

તો’ય કઉ મારે ભઈ તારું બહું કાંમ સે..

-નવનીત ઠક્કર.

થઈ ગયું..

2009-04-22T15:08:00.001+05:30

બધું જ સખળ ડખળ થઈ ગયું.

રઘવાટનું જ નર્યુ પડળ થઈ ગયું.

શો કરવો આનો ઈલાજ કહો,

પાક્યુ દુ:ખ ને કમંડળ થઈ ગયું.

હવે શું અવતરશે સવારની કુખેથી?

સમણું પોતે જ જ્યાં વ્યંઢળ થઈ ગયું.

આંગણની તો દશા શી થશે પછી?

આંખ દદડી’ને ફળિયું સજળ થઈ ગયું.

છટકું ગોઠવીને સરકી ગઈ ઊંઘ,

એટલે જ સ્તો મટકુ પ્રબળ થઈ ગયું.

જુઓ કેડીઓ તાણી જાય છે રસ્તાને,

કેવું અનોખું સંઘબળ થઈ ગયું!

નહી કરું આવુ અડપલું હવે કદી,

નાખ્યું કશુંક ને આતો વમળ થઈ ગયું!

-નવનીત ઠક્કર.

વેંત રાતું ગીત

2009-03-26T17:08:00.001+05:30

જાસો મોકલીને પછી વાંસો ધરો એમાં બંનેનું નાક ન કપાય!

એકાદો હડસેલો ખાવાથી અમથીના દખડાંની ચોટ ન મપાય.

દરવાજા ફેંદ્યાથી ઝાઝું કઈ લાધે નહી બહુ બહુ તો ફાટ્યો દેખાય.

આરપાર જોવાનાં કામબાણ તાક્યેથી સરવાળે શમણાં વીંધાય.

ચામડી ઉધેડેલી વાધરીઓ ખેંચેથી દલડાં ફાટ્યાં ના સંધાય,

એકાદો હડસેલો ખાવાથી અમથીના દખડાંની ચોટ ન મપાય....

પાંપણથી ગૂંથો ના અંકોડા આંખોમાં પાંખોથી પકડો ના લાગ

આલિંગનથી મથ્યે વરસોના વરસો કઈ લાધે ના પડખાનો તાગ!

ચિતા પર ફુલડાની લાશો ઢાળો તોય મડદુનાં મઘમાતું થાય,

એકાદો હડસેલો ખાવાથી અમથીના દખડાંની ચોટ ન મપાય....

-નવનીત ઠક્કર.

સાયબાની ....

2009-03-20T20:10:00.006+05:30

પીળાપચક મ્હારાં હૈયાના કેના પર

સાયબાની નારંગી છાંટ!

સખી! ભમરાંઓ માંડે પંચાત,

મૂઆ ઘેર ઘેર ફેલાવે વાત!

નેણના કર્યા તે સખી હૈયે કાં વાગે

મારી રાત્યુંની છિનવઈ નિરાંત;

એની તમરાંઓ માંડે પંચાત,

મૂઆ ઘેર ઘેર ફેલાવે વાત!

-ગુરુદત્ત ઠક્કર.

મારી પિચકારી....

2009-03-16T17:02:00.003+05:30

મનડાંની કડવાશો હોમી છે અગનિમાં પ્રગટાવી હૈયે મેં હોળી,

દોસ્ત આજ રંગાજો હૈયું ખોલીને, મારી પિચકારી પ્રેમમાં ઝબોળી!

રક્તરંજિત..

2008-12-03T19:40:00.002+05:30

શાને સહુ મા હવે હુ તારા રક્તરંજિત ચહેરા,

પાકના નાપાકે દીધા ઘા બદન પર ગહેરા।

ન્યાયતો અંધ જ હતા, લ્યો સત્તાધીશ પણ બહેરા,

બદલવા નકશા રહ્યા, હવેતો તોડી સરહદ-પહેરા।

-ગુરુદત્ત ઠક્કર।

હાઈકુ:

2008-11-25T08:53:00.002+05:30

હિમાલયથી

છે વાતાનુકૂલિત

દેશ અમારો

-ગુરુદત્ત ઠક્કર.

નહી..

2008-11-11T18:21:00.011+05:30

વાંસલડી ભીની થઈ ગઈ

સૂર ભીના રેલાયાં નહી

દુર રહ્યે પણ સ્પર્શ થયો

પડખાં નજીક લાવ્યા નહી

કંઈક હળાહળ કંઠ ધર્યા

કંઠના રંગ બદલાયા નહી

ઘૂઘવાટો ને પોંખ્યાં બહુ

ઝરણો ને બિરદાવ્યા નહી

બાંગ-નમાજે શ્વાસ છુટ્યા
કબરે કાબા આવ્યા નહી

સુરજ ગ્યો ને રાત ઢળી
અજવાળા પરખાયા નહી

રંગારો હાથ ધોઈ બેઠો

હૈયા કો' રંગાયા નહી..
-ગુરુદત્ત ઠક્કર.

નૂતન વર્ષાભિનંદન

2008-10-29T07:47:00.003+05:30

તનમન તણા વૈભવ મળે, સંપત્તિ નિર્વિવાદ મળે,

સ્નેહ મળે કુટુંબનો, વડીલના આશિર્વાદ મળે.

મંગલ બને હર કાર્ય, ને નૂતન બને જીવન સતત,

ઘટનાઓને કોલાહલે, બસ સાચો અંતરનાદ મળે....

-ગુરુદત્ત ઠક્કર.

હાઈકુ:

2008-10-22T06:06:00.002+05:30

લ્યો હ્ર્દય- ને

કરો ઇન્ટીરિયર

ડેકોરેશન...

-ગુરુદત્ત ઠક્કર.

..માંગી લો..

2008-10-20T10:02:00.002+05:30

ગાંઠ બાંધો પાલવે, ને માંગી લો, જલ્દી કરો!

તૂટતો તારો છુ હું, કોઈ રંજ મારો ના કરો..

-ગુરુદત્ત ઠક્કર.

હાઈકુ:

2008-10-17T09:22:00.002+05:30

રંગ ભરંતા

હ્રદયાકાશે -તમે

ભોરનાં ભાનુ॥

-ગુરુદત્ત ઠક્કર

આંધી ઉઠે!

2008-10-03T22:26:00.001+05:30

હવે તો હ્રદયના આ રણમાં કોઈ આંધી ઉઠે!

સદીઓથી નિર્જીવ ખુણે સુતેલો એક ગાંધી ઉઠે!

-ગુરુદત્ત ઠક્કર.

ગઝલ

2008-09-24T12:46:00.002+05:30

હુ જાણું ’ને તું પણ જાણે,

કોણ પછી કોને પરમાણે!

પૂરશો તોયે વળશે ના કંઈ,

છિદ્રો જુદાં કાણે-કાણે.

સીમ વસી ગઈ શહેર રચાવી,

કૂતરું ગામ ભણી છો તાણે.

ભીંતો આમ ચણ્યે રાખી ને,

લોક જમે છે એક જ ભાણે.

ગાળ હોત તો ગળી જતે પણ,

જાળ છળી ગઈ પહેલાં આણે.

એની વાત કરીશ ના મનિયા,

એ તો ભઈ સઘળાં ને નાણે.

એક ટીપું આંસુ નહી ટપકે,

આંખ મઢાવી એ જ પ્રમાણે.

તાપ ગઝલને હવે અડકશે

કાચી રહી છો પહેલાં ઘાણે.

-નવનીત ઠકકર.

અટકળ

2008-08-17T23:21:00.005+05:30

આતો અમથી અટકળ છે

કનડે એવું કાજળ છે.

બાવળીયે કાઢ્યું કાઠું,

એણે ઝીલ્યું ઝાકળ છે.

વરસીને પણ કરશે શું

વ્હેત વગરનું વાદળ છે.

આ કઈ ચપટી મેળ નથી,

ગૂંચ વિનાની સાંકળ છે.

પરબિડીયું ખોલી જોયું

અંદર કોરો કાગળ છે.

પડછાયાની જેમ જ જો

પગલું તારી પાછળ છે.

શબ્દકોશીયો સ્પર્શ નથી

અર્થવિદથી આગળ છે.

શોધો એનો ભેદભરમ

ભીનું ભીનું મ્રુગજળ છે.

ઠંડીને વળગી પડવા

તડકો કેવો વિહ્વળ છે.

જઈએ ચાલ સુરાલયમાં

લાગણીઓ ત્યાં પુષ્કળ છે.

રાજ કરે નાગા-ભૂખ્યાં

દેશનું ભાવી ઉજ્વળ છે.

બાકી તો નશ્વરનાં ખેલ

એનું હોવું કેવળ છે।

-નવનીત ઠક્કર.

મિલનનો મેહુલ

2008-08-12T21:02:00.004+05:30

સમય પછીના મિલનનો મેહુલ,

અજબ સ્વરૂપે ઢળીયો

આંખ તમારી બની સરિતા,

દિલ થ્યું મારૂ દરિયો..

-ગુરુદત્ત ઠક્કર.